Дар чанд ҷумла
Ҳукумати Душанбе барои "Манзили дастрас" сарпараст меҷӯяд. ВИДЕО
Мақомоти шаҳрдории Душанбе гуфтанд, ки талош доранд, тарҳи "Манзили дастрас"-ро аз ҳолати буҳронӣ берун кунанд. Маҳмадсаид Зувайдзода, муовини аввали раиси шаҳри Душанбе, рӯзи 25-уми июл дар як нишасти хабарӣ гуфт, бо ин ҳадаф ҳоло дар ҷустуҷӯи сарпараст ҳастанд.
Зувайдзода гуфт, тафтишоти "Манзили дастрас" ахиран аз сӯи кормандони Оҷонсии назорати молиявӣ ва мубориза бо коррупсия низ анҷом ёфта, баъзе камбудҳои ошкоршуда дар ҳоли баррасист. "Як комиссия ташкил шудааст, то ин тарҳро аз буҳрон берун орем. Вақту маблағ зарур аст", - афзуд ӯ.
Тарҳи "Манзили дастрас" яке аз тарҳҳои шаҳрдории Душанбе дар замони раҳбарии Маҳмадсаид Убайдуллоев буд. Убайдуллоев дар моҳи январи соли ҷорӣ аз мақомаш барканор ва ба ҷои ӯ Рустами Эмомалӣ, писари калонии раиси ҷумҳур, таъйин шуд.
Видео аз бойгонӣ дар бораи тарҳи "Манзили дастрас":
Тарҳи "Манзил дастрас" соли 2013 бо ҳимояти шаҳрдории Душанбе рӯи даст гирифта шуд ва қарор буд, ки нахустин манзилҳои нисбатан арзон дар пойтахт дар моҳи сентябри соли 2015 соҳибони худро пайдо намоянд. Бархе аз биноҳои истиқоматии баландошёна бар асоси ин тарҳ дар маҳаллаи маъруф ба “Профсоюз”-и ноҳияи Синои шаҳри Душанбе бунёд мешаванд.
Вале тӯл кашидан ва ба кундӣ пеш рафтани корҳои сохтмонӣ баъзе аз саҳмдоронро нигарон кард ва бархеи онҳо соли гузашта аз хавфи онки дар охир ҳам бе хона ва ҳам бе пул намонанд, хостори бозпас гирифтани маблағҳои то ин дам пардохтаашон шудаанд.
Ҳамаи хабарҳои имрӯзро дар инҷо бихонед
"Ба об афтоданд." Ҷустуҷӯи ду сарбози Вазорати дифоъ дар дарёи Вахш
Ду сарбози яке аз қисмҳои низомии Вазорати дифои Тоҷикистон, воқеъ дар ноҳияи Кӯшониён, дар дарёи Вахш ғарқ шудаанд.
Мақомот дар Хатлон гуфтанд, ки ҳодиса рӯзи 30-юми июл иттифоқ уфтод ва аз он замон ҷустуҷӯи сарбозон идома дорад.
Як манбаи Радиои Озодӣ дар Идораи ҳолатҳои фавқулодаи Хатлон аз сарбозони ғарқшуда Солеҳ Худойбердиеви 19-сола ва Равшан Муҳаммади 20-сола ном бурд.
Ба гуфтаи ҳамсуҳбати мо, "амалиёти ҷустуҷӯи ду сарбоз дар соҳили Вахш то ноҳияи Қубодиён идома дорад. Сабаби дер пайдо шудани ҷасадҳо, баланд будани сатҳи оби дарёи Вахш ва бо шиддат ҷорӣ шудани он аст."
Ҳафтаи гузашта низ ду ҷавон дар дарёи Вахш ғарқ шуда буданд ва ҷасади онҳо то ҳол пайдо нашудааст. Яке аз пайвандони ин ҷавонони ғарқшуда аз ноҳияи Кӯшониён ба Радиои Озодӣ гуфт, ки дар баробари кормандони Кумитаи ҳолатҳои фавқулода худи онҳо низ дар соҳили дарё ҷасадҳоро ҷустуҷӯ доранд.
Тибқи омори расмӣ, аз аввали сол дар кӯлҳову дарёҳои вилояти Хатлон беш аз 50 нафар ғарқ шудаанд. Аксарияти онҳо дар рӯзҳои гарм ва ҳангоми оббозӣ дар соҳили кӯл ё дарё ҷони худро аз даст додаанд.
Камбуди ҳавзҳои шиноварӣ дар аксар шаҳру навоҳӣ ҷой дорад ва сокинон дар рӯзҳои гарм дар кӯлу дарёҳо оббозӣ мекунад, ки гоҳо ба марги онҳо меанҷомад.
"Тоҷпромбонк" 28 млн сомонии муштариёнашро надодааст
"Тоҷпромбонк" - яке аз собиқ бонкҳои Тоҷикистон, то ҳол бистуҳашт миллион сомонии 177 амонатгузорашро барнагардондааст.
Зулфия Саидзода, додраси Додгоҳи олии иқтисодии Тоҷикистон дар нишасти хабарӣ гуфт, ин бонк то моҳи октябри соли 2027 муҳлат дорад, ки пули амонатгузоронро баргардонад.
Ба иттилои манбаъ, "бинобар пурра иҷро нагардидани ӯҳдадориҳо ва ба фурӯш нарафтани дороиҳо", мӯҳлати мурофиаи муфлисшавии бонки мазкур дароз карда шудааст.
Қаблан мақомот гуфта буданд, ки "Тоҷпромбонк" ҳангоми муфлисшавиаш аз 5 ҳазору 929 амонатгузор қарздор буд ва дар ин муддат қарзи 5 ҳазору 752 амонатгузорро пардохт кардааст.
Раванди муфлисшавии "Тоҷпромбонк" моҳи марти соли 2017 бо қарори Додгоҳи иқтисодии шаҳри Душанбе оғоз гардида буд.
Қарори бозхонди иҷозатномаи бонк рӯзи 24-уми феврали соли 2017 аз сӯи Бонки миллии Тоҷикистон содир гардид. Бонк 1-уми августи соли 2023 расман аз ҷониби Додгоҳи олии иқтисодӣ муфлис эълон гардид.
Намояндагони Бонки миллии Тоҷикистон борҳо ваъда додаанд, ки аз ҳисоби фурӯши амволи бонкҳои муфлисшуда маблағи мардум бозпас дода мешавад.
Муштариён то ҳол нигарони амонатҳои гузоштаашон ҳастанд.
Парванда бар зидди 156 кас барои надодани "алимент"
Хадамоти иҷрои Тоҷикистон мегӯяд, барои барқасдона саркашӣ намудан аз пардохти маблағи алимент, нисбати 156 тан аз падарони қарздор парвандаи ҷиноятӣ оғоз гардидаааст.
Аз инҳо 25 кас зиндонӣ шуда, 107 тан ба корҳои ислоҳӣ ҷалб шуданд ва 25 нафари дигарро ҷарима карданд. Ҳамчунин, 410 нафарро барои саркашӣ аз пардохти маблағи алимент ва пинҳон кардани суроғаи зист, дар кофтуков қарор додаанд.
Раҳбарони Хадамоти иҷро, ниҳоди амаликунандаи амру дастурҳои додгоҳ гуфтанд, дар 6 моҳи соли ҷорӣ беш аз 57 миллион сомонӣ ба модару кӯдак ҳамчун алимент пардохт шудааст.
Аҳтам Абдуллозода, сардори ин ниҳод гуфт ба Феҳристи ягонаи давлатии қарздорон ё "рӯйхати сиёҳ"-и ин Хадамот, танҳо дар 6 моҳ ҳазору 308 шахси воқеӣ ва 10 шахси ҳуқуқӣ ворид карда шуданд, ки баъди ин наметавонанд кишварро тарк кунанд.
Ба ин феҳрист қарздороне дохил мешаванд, ки тибқи қарорҳои додгоҳ бояд маблағи қарзро пардохт кунанд. Ба иттилои ин ниҳод, дар умум то имрӯз, 2 ҳазору 910 нафар дар ин феҳрист қарор доранд.
Дар Тоҷикистон барои саркашӣ аз пардохти алимент ҷарима ё то се сол зиндон таъйин шудааст.
Тафтишу боздошти садҳо хориҷӣ дар Маскав. Муҳоҷирони тоҷик ҳам ҳастанд
Мақомоти интизомии Русия мегӯянд, дар ҷараёни як амалиёт танҳо дар шаҳри Маскав 400 хориҷиро тафтиш ва сесад нафари онҳоро дастгир кардаанд, ки дар байнашон ғолибан муҳоҷирони тоҷик ҳам ҳастанд.
Дар видеое, ки Горди миллии Русия дар каналаш дар Телеграм нашр кард, дида мешавад, ки чӣ гуна маъмурони амниятӣ муҳоҷирони зиёдеро қатор гузоштаанд ва баъзеҳоро намоишкорона тафтиш мекунанд.
Горди миллии Русия бо нашри баёнияи расмӣ гуфтааст, амалиёт дар яке аз ҳостел ё меҳмонсароҳои маркази Маскав сурат гирифт.
Дар миёни боздоштшудагон, ба иттилои расмӣ, 300 нафар ба риоят накардани қоидаҳои муҳоҷират муттаҳам мешаванд ва онҳоро барои идомаи тафтиши санадҳояшон ба идораҳои пулис бурдаанд.
Маълум нест, ки чанд нафар аз дастгиршудагон шаҳрвандони Тоҷикистон ҳастанд, вале дар дасти яке аз маъмурони пулис як шиносномаи тоҷикӣ ба таври рӯшан дида мешавад.
Ба қавли Горди миллии Русия, сарбозонаш ба кормандони Кумитаи тафтишот дар ин амалиёт кумак кардаанд.
Дар Русия дар як соли гузашта муҳоҷирситезӣ ва амалиёт ба зидди муҳоҷирон авҷ гирифтааст ва дар ин муддат даҳҳо ҳазор муҳоҷири тоҷикро бо ҳар баҳонае аз хоки Русия ихроҷ кардаанд.
Ду кушта ва даҳ захмӣ. Ҳамлаи нерӯҳои Русия ба Лозоваи Украина
Ҳамлаҳои низомии Русия дар рӯзи 5-уми август ба зерсохтҳои муҳим дар шаҳри Лозова дар минтақаи Харкови Украина осеби ҷиддӣ расонд ва боиси кушта шудани ду кас ва захмӣ шудани дастикам 10 нафар, аз ҷумла ду кӯдак шуд.
Ин ҳамла ҳудуди соати 3-и субҳ оғоз шуд ва боиси сӯхтор дар саросари шаҳр ва халалдор шудани рафтуомади қаторҳо дар минтақаи стратегии Лозова гашт.
Ширкати миллии роҳи оҳани Украина тасдиқ кард, ки яке аз кормандонаш, механики навбатдор, дар ин ҳамла кушта шудааст. Чаҳор коргари дигари роҳи оҳан захмӣ шудаанд ва таҳти дармон ҳастанд.
Ин ширкат гузориш дод, ки аксари ғайринизомиён дар минтақа муваффақ шуданд сари вақт ба паноҳгоҳҳо бирасанд ва аз талафоти бештар пешгирӣ шуд.
Сергей Зеленский, раҳбари маъмурияти низомии шаҳри Лозова гуфт, бомбаборон ба биноҳои истиқоматии баландошёна, хонаҳои шахсӣ ва зерсохтҳои калидӣ осеб расонд.
Ба гуфтаи вай, "мутаассифона, дар миёни захмиён кӯдакон низ ҳастанд". Зеленский афзуд, хадамоти изтирорӣ барои барқарор кардани обу барқ дар бахшҳои гуногуни шаҳр кор мекунад.
Зеленский гуфт, зархаридони тоҷик дар ҷабҳаи аввали ҷанг ҳастанд
Раисҷумҳури Украина гуфт, дар ҷанги Русия ба зидди ин кишвар зархаридони хориҷӣ, аз ҷумла аз Тоҷикистон ҳам дар ҷабҳаи аввали ҷанг ширкат мекунанд.
Владимир Зеленский рӯзи 4-уми август, ҳангоми боздиди ғайриинтизор аз вилояти Харкови ҳаммарз бо Русия бо сарбозони украинӣ дар бораи истифодаи паҳподҳо дар ҷанг суҳбат кард.
Ӯ сипас дар баёнияе дар шабакаҳои иҷтимоӣ навишт, "ҷанговарони мо дар ин қисмат дар бораи ширкати зархаридон аз Чин, Тоҷикистон, Узбекистон ва Покистону кишварҳои африқоӣ дар ҷанг гузориш медиҳанд. Мо ба ин посух хоҳем дод."
Ҳукумати Покистон иддаои Зеленскийро беасос хонда, гуфт, ки ба онҳо дар бораи ҳузури покистониҳо дар ҷанги Украина ҳеч далеле нишон надодаанд.
Вокуниши ҷониби Тоҷикистон маълум нест, аммо дар бораи ҳузури тоҷикон дар ҷанги Русия ба зидди Украина то кунун гузоришҳои зиёде нашр шудаанд. Аз ҷумла, Радиои Озодӣ дар бораи кушта шудани даҳҳо зодаи Тоҷикистон дар ҷанги Украина ва ё маҷбурӣ аз кӯчаву зиндон ба артиши Русия бурда шудани онҳо гузориш дод.
Чанде пеш тарҳи давлатии "Зистан мехоҳам" (Украина) номи бештар аз 900 зодаи Тоҷикистонро нашр кард, ки бо артиши Русия қарордод баста, дар ҷанг ширкат кардаанд ва тақрибан 200 нафарашон ҳам кушта шудаанд.
Як таҳқиқоти рӯзноманигории Би-би-сӣ ва "Медиазона" ҳам номи 72 шаҳрванди Тоҷикистонро маълум кардааст, ки аз тарафи Русия ба ҷанги Украина рафта, он ҷо кушта шудаанд.
Теъдоди дақиқи зодагон ё шаҳрвандони Тоҷикистон, ки ба ҷанги Русия зидди Украина ҷалб шудаанд, маълум нест. Мақомоти Тоҷикистон соли 2023 танҳо сад мавриди ҷалби маҳбусони тоҷикро аз зиндонҳои Русия ба ҷанг тасдиқ карда, дигар дар ин бора маълумоте надодаанд. Танҳо дар чанд маврид аз муҳоҷирон хостаанд, ки ба ҷанги бегона нарванд, чун ҷавобгарӣ дорад.
Муоинаи ҳатмии муҳоҷирон. Қонуни нав дар Узбекистон
Вакилони мардумии Узбекистон қонунеро қабул карданд, ки муоинаи тиббии муҳоҷирони кориеро, ки 90 рӯз бештар дар хориҷ аз кишвар будаанд, ҳатмӣ месозад.
Талаботи ба ин монанд барои хориҷиёни муқими Узбекистон ва шахсони бидуни шаҳрвандӣ низ таъйин шудааст.
Қонунро Маҷлиси Олӣ ё палатаи болоии порлумони Узбекистон рӯзи 1-уми август қабул кард.
Ҳадафи он ошкор кардани бемории ВИЧ/СПИД ё вируси норасоии масунияти бадан, сил ва ё бемориҳои дигари сироятии хатарнок барои аҳолӣ гуфта шудааст.
Бар асоси қонун, афроди аз 18 то 60-солае, ки бештар аз 90 рӯз хориҷ аз Узбекистон будаанд, баъди бозгашт бояд ҳатман аз муоинаи тиббӣ бигзаранд, то маълум шавад, ки бемориҳои сироятии мазкурро доранд ё на.
Дар баёнияи расмии Маҷлиси Олии Узбекистон омадааст, соли 2024 дар миёни 434 ҳазор нафари бозгаштае, ки барои бемории норасоии масунияти бадан ихтиёран муоина шудаанд, бештар аз 1500 нафари мубтало ба беморӣ кашф ва сабт шудааст. Дар байни 81 хориҷӣ ҳам ин бемориро ёфтаанд.
Дар Тоҷикистон ҳам мақомоти расмӣ мегӯянд, дар байни тамоми гирифторони бемории ВИЧ/СПИД дар кишвар ҳар саввумин нафари онҳо муҳоҷири корӣ будаанд.
Маркази мубориза бо бемории норасоии масунияти бадан ва пешгирӣ гуфтааст, дар Тоҷикистон дар 5 соли гузашта тақрибан 5500 мавриди нави беморӣ сабт шудааст ва 22 дар сади гирифторон ҳам муҳоҷирон будаанд.
Ҳушдори дубораи Трамп ба Ҳиндустон дар бораи боҷи гумрукӣ
Раисҷумҳури Амрико бори дигар ба Ҳиндустон ҳушдор дод, ки ба далели хариди нафт аз Русия боҷи гумрукиро ба колоҳои ин кишвар ба таври чашмрас афзоиш медиҳад.
Доналд Трамп рӯзи 4-уми август дар Truth Social навишт, Ҳиндустон аз Русия нафти зиёд харида, сипас онро “барои фоидаи калон” мефурӯшад.
"Онҳо парво надоранд, ки чӣ қадар одамон дар Украина аз дасти мошини ҷангии Русия кушта мешаванд," – навишт Трамп.
Хабаргузории “Ройтерс” аз қавли сухангӯи Вазорати корҳои хориҷии Ҳиндустон гуфт, ҳадаф қарор додани Ҳиндустон на одилона аст ва на мантиқӣ.
Президенти Амрико ҳушдор додааст, ки агар Маскав то рӯзи ҷумъа барои хатми ҷанги сеюнимсолааш бо Украина чора набинад, алайҳи кишварҳое, ки аз Русия сӯзишворӣ мегиранд, таҳримҳои нав ҷорӣ хоҳад кард.
Бо вуҷуди гузаштани муҳлат Маскав ҳеч аломате аз тағйири мавқеаш дар бораи ҷанги Украина нишон надодааст.
Сухангӯйи Кремл Дмитрий Песков рӯзи душанбе гуфт, онҳо мунтазири боздиди фиристодаи вижаи раисҷумҳури Амрико аз Маскав ҳастанд.
Интизор меравад, Стив Виткофф рӯзи 6 ё 7-уми август дар Маскав бо мақомоти Русия дар бораи ҷанги Украина ва ҳушдори Трамп мулоқот кунад.
“Даҳҳо дарахт сӯхт.” Дар теппаҳои Адрасмон чӣ гузашт?
Масъулони Идораи ҳолатҳои фавқулода ва ҳифзи муҳити зист дар вилояти Суғд гуфтанд, ки сӯхтори азимро дар заминҳои марбут ба кони Адрасмон дар шаҳри Гулистон таҳқиқ доранд.
Ин сӯхтор дар охири моҳи июл сар зада, сокинонро ба ташвиш овард. Чанд сокини маҳаллӣ бо фиристодани аксу навор ба Радиои Озодӣ гуфтанд, бори аввал чунин сӯхтори азимро мебинанд ва аз пайомади он нигарон ҳастанд.
Ҷамшед Кӯчаков, муовини сардори Идораи ҳолатҳои фавқулода дар вилояти Суғд, гуфт, “сӯхтор хомӯш карда шуд. Дар натиҷа дар ҳудуди ду гектар дарахтону алафҳои худрӯй зарар диданд”.
Сардори Сарраёсати ҳифзи муҳити зист дар вилояти Суғд мегӯяд, дар он минтақа асосан арчаҳои зарафшонӣ ва буттаҳои ҷангалӣ оташ гирифтаанд ва гармои сахт яке аз сабабҳои асосии сӯхтор дониста мешавад.
Сӯҳроб Холзода афзуд: “Агар як сабаби асосии сӯхтор тағйирёбии иқлим бошад, сабабҳои дигарро ниҳодҳои дахлдор таҳқиқ доранд. Ба ҳисоби мо, 100 бех дарахти бисёрсола ва зиёда аз 150 арчаи зарафшонӣ нобуд шудаанд”.
Гуфт мешавад, заминҳое, ки сӯхтаанд, дар ихтиёри кони маъдани корхонаи Адрасмон қарор доштаанд. Ин корхона тақрибан 15 сол боз аз кор монда, ахиран сармоягузорони Чин хостаанд, онро аз нав ба кор андозанд. Ин шаҳрак бо 16 ҳазор аҳолияш дар дурии тақрибан 100 километр аз маркази вилояти Суғд ҷойгир аст.
Дар нимаи аввали соли равон дар ҷангалҳои 9 минтақаи Тоҷикистон 434 гектар ҷангал сӯхтааст. На танҳо гармои шадид, балки беэҳтиётии одамон аз сабабҳои сӯхтани бешазорон номбар мешавад.
"Гуфтанд, ҳаққи рафтан надорӣ." Русия монеи сафари як зодаи Тоҷикистон шуд
Мақомоти интизомии Русия ба як шаҳрванди 56-солаи Тоҷикистон иҷоза надодаанд, ки хоки ин кишварро тарк кунад ва ба назди хешонаш ба шаҳри Исфара баргардад. Онҳо гуфтаанд, номи Диловар Ҷӯраев ҳанӯз дар рӯйхати шахсони мавриди ҷустуҷӯ аз тарафи Қирғизистон ҷой дорад.
Номи Диловар Ҷӯраев соли 2021 ва пас аз ҷанҷолҳои марзии Тоҷикистон ва Қирғизистон расонаӣ шуд. Ӯ рӯзи 4-уми август дар суҳбат бо Радиои Озодӣ гуфт, тайи бештар аз чаҳор сол бо чунин душворӣ рӯ ба рӯст ва ҳарчанд баҳси сарҳадии Тоҷикистон ва Қирғизистон ҳал шуд, қазияи ӯ ҳалношуда монд.
“Маро аз фурудгоҳи шаҳри Новосибирск пас гардонданд. Маъмурони марзбонӣ гуфтанд, ки аз ҷониби Қирғизистон таҳти пайгард ҳастам ва иҷозаи берун рафтан аз хоки Русияро надорам. Ба консулгарии Қирғизистон муроҷиат кардам. Дар онҷо гуфтанд, ки имкон надорад,” – нақл кард ӯ.
Ҷӯраев иддао дорад, ки ба монанди ӯ чанд сокини дигари Исфара дар Русия мавриди ҷустуҷӯи Қирғизистон ҳастанд ва ба ҳамин далел ба зодгоҳ баргашта наметавонанд.
Мақомоти интизомии Русия Диловар Ҷӯраевро дар моҳи ноябри соли 2021 бо дархости Қирғизистон дастгир, вале дертар раҳо карданд. Қирғизистон сабаби дар пайгард қарор додани ӯро ба “ташкили бетартибиҳои оммавӣ” ва “авбошӣ дар минтақаҳои наздисарҳадӣ” байни Исфараи Тоҷикистон ва Бодканди Қирғизистон пайванд дод.
Додситонии кулли Тоҷикистон соли 2021 ин айбномаро дорои ангезаи сиёсӣ донист ва аз Додситонии кулли Русия хост, талаби Қирғизистонро бе баррасӣ гузорад. Диловар Ҷӯраев мегӯяд, аз он замон дар озодист, вале аз ҳудуди Русия берун рафта наметавонад. Вай ҳоло аз ниҳодҳои Тоҷикистон мехоҳад, ки қазияи ӯ ва ҳамтақдиронашро дар мулоқот бо ҷониби Қирғизистон дар миён гузоранд ва роҳаллеро пайдо кунанд.
Ба ҷуз аз Диловар Ҷӯраев, бо дархости Қирғизистон Фурқат Абдуфаттоев ва Комилҷон Юлдошев, сокинони шаҳри Исфара, низ дар Русия бо душворӣ дучор шудаанд. Бо дархости Тоҷикистон як шаҳрванди Қирғизистон ҳам дар Русия дастгир шуд.
Сарчашмаи парвандаи ин афрод муноқишаи хунин дар марзи Тоҷикистону Қирғизистон дар моҳи апрели соли 2021 аст. Душанбе ва Бишкек ҳамдигарро ба барангехтани ин ҷанҷол муттаҳам карданд, ки сабабаш таъйину нишонагузорӣ нашудани марз ва даъво барои обу замин буд ва аз ҳарду тараф куштаву захмии зиёд барҷой гузошт.
Ҳоло ҳарду тараф созиши марзиро имзо ва ба нишонагузории сарҳади давлатӣ сар кардаанд. Созише, ки Қирғизистон ҷузъиёташро ба мардумаш гуфт, вале Тоҷикистон ҳанӯз пинҳон медорад.
Мӯҳлати ҳабси гумонбарони ҳамла ба "Крокус" 6 моҳи дигар тамдид шуд
Додгоҳи ҳарбӣ мӯҳлати ҳабси 19 нафар гумонбарон ва шарикони ҳамлаи террористӣ ба "Крокус Сити ҳол"-ро барои 6 моҳи дигар тамдид кард.
Дар ин бора хабаргузории давлатии ТАСС рӯзи 4-уми август аз қавли вакили мудофеъ Людмила Айвар хабар додааст.
Людмила Айвар намояндаи ҳуқуқии 127 ҷабрдида аст. Ба иттилои ин вакили дифоъ, бо қарори додгоҳ мӯҳлати ҳабси муттаҳамон то 7-уми январи соли 2026 тамдид карда шудааст.
Муҳокимаи гумонбарони ҳамла ба "Крокус" рӯзи чоруми август дар пойтахти Русия паси дарҳои баста сурат гирифт, ки аксарияташон шаҳрвандони Тоҷикистон ҳастанд.
Дар курсии гумонбарон ба ҷиноят 19 нафар нишастанд, ки ба тарҳрезиву мусоидат ва анҷоми ҳамлаи террористӣ муттаҳам мешаванд.
Ба гузориши расонаҳои давлатии Русия, Фаридуни Шамсиддин, Далерҷон Мирзоев, Муҳаммадсобир Файзов ва Саидакрам Раҷабализода – чаҳор шаҳрванди Тоҷикистон, ки омилони асосии ҳамла ба толори "Крокус" номбар мешаванд, ба гуноҳи худ иқрор шуда, изҳори пушаймонӣ кардаанд.
Людмила Айвар гуфтааст, "баъд аз хондани айбнома омилони асосии ҳамлаи террористӣ изҳор доштанд, ки ба гуноҳи худ пурра иқрор мешаванд ва аз кардаашон пушаймон ҳастанд."
Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024 149 нафар нафар кушта ва 609 каси дигар маҷруҳ шуданд.
Хушунат нисбати кӯдакон дар Тоҷикистон 30 дарсад зиёд шудааст
Хушунат нисбати кӯдакон дар Тоҷикистон 30 дарсад зиёд шудааст. Суҳайлӣ Қодирӣ, як масъули идораи Ваколатдор оид ба ҳуқуқи кӯдак рӯзи 4-уми август зимни як нишасти хабарӣ гуфт, танҳо дар шаш моҳи соли ҷорӣ вобаста ба масъалаҳои зӯроварӣ дар оила ба онҳо 6 муроҷиат ворид шудааст.
Ӯ дар робита ба ҳодисаҳои ахире, ки кӯдакон аз ҷониби падару модар хушунат дидаанд, гуфт, ин гуна ҳолатҳо боиси нигаронӣ аст.
Чанд рӯз қабл марги Хусрав Одинаеви 15-сола дар шаҳри Турсунзода, ки аз шиканҷаи падар ҷон дод, сокинони Тоҷикистонро ваҳшатзада кард ва дар шабакаҳои иҷтимоӣ сару садои зиёдро ба миён овард.
Ҳамчунин, рӯзи 5-уми июл як кӯдаки шашмоҳа, ки аз сӯи модараш бо зарби корд захмӣ шуда буд, дар бемористони ноҳияи Шаҳритус фавтид.
Бархе аз равоншиносон мегӯянд, наврасон бештар замоне ба хушунат дар оила дучор мешаванд, ки падару модар миёни ҳам муноқиша доранд ё аз ҳам ҷудо шудаанд.
Ба таъкиди равоншиносон, зану шавҳар набояд дар ҳолати нофаҳмиҳо дар оила, аз фарзандон ҳамчун василаи фишор ба якдигар истифода баранд.
Ҳалокати ду нафар ҳангоми кандани чоҳ дар Ваҳдат
Кумитаи ҳолатҳои фавқулодаи Тоҷикистон аз ҳалокати ду нафаре хабар дод, ки ҳангоми кандани чоҳ дар ноҳияи Ваҳдат ҷон додаанд.
Дафтари матбуоти Кумита бо нашри як баёния гуфт, ҳарду нафар рӯзи 3-юми август “ба фалокат дучор омада, ҷони худро аз даст доданд.”
Дар ин баёния омадааст, ки ҳангоми кандани чоҳ дар як хонае дар маҳаллаи чаҳордаҳуми шаҳри Ваҳдат хоки зиёде ба сари ду нафар фурӯ рехтааст. Яке аз қурбониён 30 ва дигарӣ 46-сола аст.
Маъмурони наҷот ҳамроҳи маъмурони милиса ва кумаки мардум ҷасадҳоро соати 11-и шаб берун оварда, ба мақомот супурдаанд.
Кумитаи ҳолатҳои фавқулода дар як баёнияи дигаре аз марги ду наврас дар шаҳри Исфара ва ноҳияи Сино дар Душанбе хабар додааст.
Дар баёния омадааст, ки як кӯдаки 8-сола аз деҳаи Хонободи Исфара рӯзи 3-юми август ҳангоми оббозӣ дар дарёи Исфара ва навраси 12-солаи дигар аз ноҳияи Сино рӯзи 2-юми август дар канали Ҳисор ғарқ шуда, ҷон додаанд. Наҷотбахшон ҷасади ҳардуро пайдо карда ва ба хешовандонашон супурдаанд.
ТАСС: Гумонбарони асосии ҳамла ба "Крокус" изҳори пушаймонӣ карданд
Ба гузориши расонаҳои давлатии Русия, Фаридуни Шамсиддин, Далерҷон Мирзоев, Муҳаммадсобир Файзов ва Саидакрам Раҷабализода – чаҳор шаҳрванди Тоҷикистон, ки омилони асосии ҳамла ба толори "Крокус" номбар мешаванд, ба гуноҳи худ иқрор шуда, изҳори пушаймонӣ кардаанд.
Дар ин бора хабаргузории давлатии ТАСС рӯзи 4-уми август аз қавли вакили мудофеъ Людмила Айвар хабар додааст. Айвар намояндаи ҳуқуқии 127 ҷабрдида аст.
Муҳокимаи гумонбарони ҳамла ба "Крокус" рӯзи чоруми август дар пойтахти Русия сар шуд, аммо паси дарҳои баста сурат мегирад.
Людмила Айвар гуфтааст, "баъд аз хондани айбнома омилони асосии ҳамлаи террористӣ изҳор доштанд, ки ба гуноҳи худ пурра иқрор мешаванд ва аз кардаашон пушаймон ҳастанд."
Ба қавли вай, Фаридуни Шамсиддин, Далерҷон Мирзоев, Муҳаммадсобир Файзов ва Саидакрам Раҷабализода аз ҷабрдидаҳо маъзарат хостаанд.
"Файзов изҳор дошт, ки аз ҷавонии ӯ суистифода карда, ӯро фиреб додаанд, вагарна худаш нақшаҳои дигаре барои зиндагӣ дошт," – афзудааст вакили мудофеъ.
Дар курсии гумонбарон ба ҷиноят 19 нафар нишастаанд, ки ба тарҳрезиву мусоидат ва анҷоми ҳамлаи террористӣ муттаҳам мешаванд.
Дар ҳамлаи террористӣ ба "Крокус" дар канори Маскав дар рӯзи 22-юми марти соли 2024 149 нафар нафар кушта ва 609 каси дигар маҷруҳ шуданд.
Мақомоти Тоҷикистон дар таҳқиқи парванда ширкат надоштанд ва аз ҳуқуқи шаҳрвандони худ ба таври ҷиддӣ ҳимоят накарданд.
Рӯзи 4-уми август дар нишасти хабарии Омбудсмен ё Ваколатдори ҳуқуқи инсон дар Тоҷикистон аз ӯ пурсиданд, ки оё намояндагони онҳо дар муҳокима ҳузур хоҳанд дошт ё не. Умед Бобозода гуфт, “мурофиа ҳама вақт озод аст, шояд ширкат кунем, ба шарте ки дар ҳамонҷо ҳузур дошта бошем."
Изҳороти як мансабдори баландпояи Амрико алайҳи Ҳинд
Стивен Миллер, мансабдори баландпояи ҳукумати Амрико, Ҳиндро ба он муттаҳам кард, ки бо хариди нафти Русия ҷанги ин кишварро ба зидди Украина маблағгузорӣ мекунад. Дар ин бора хабаргузории “Ройтерс” гузориш дод.
Стивен Миллер, муовини раиси дастгоҳи раёсати ҷумҳурии Амрико, ҳамзамон ба телевизиони “Фокс Нюс” гуфт: “Он чи ки раисҷумҳур, яъне Доналд Трамп рӯшан гуфт, ин аст, ки Ҳинд набояд бо хариди нафт аз Русия ҳамчунон ин ҷангро сармоягузорӣ кунад.”
Аз ин пештар расонаҳо бо такя ба манобеъе дар ҳукумати Ҳинд навиштанд, ки бо вуҷуди таҳдиди Доналд Трамп барои эъмоли таҳрим ба зидди харидорони нафти Русия, Ҳинд ҳамчунон ба хариди нафт аз Русия идома медиҳад.
Доналд Трамп рӯзи 14-уми июл гуфт, агар Русия бо Украина ба созиши сулҳ даст наёбад, Амрико аз кишварҳое, ки нафти Русияро мехаранд, боҷи иловагӣ меситонад.
Ҳинд 35 дар сади нафти зарурӣ барои худро аз Русия мехарад ва аз моҳи январ то июн рӯзона аз ин кишвар 1 миллион 750 ҳазор бушка нафт ворид кардааст.
